ლიზა ხარაიშვილი არის „სტუდია ეიდისის“ ადმინისტრაციული მენეჯერი, რომლის საქმიანობა მნიშვნელოვან როლს ასრულებს ეფექტიან და თანმიმდევრულ ფუნქციონირებაში. მისი ყოველდღიური მუშაობა მიმართულია უსაფრთხო, ორგანიზებული და მოტივირებული გარემოს შექმნაზე „სტუდია ეიდისის“ ბენეფიციარებისთვის, მათი ოჯახებისა და გუნდის წევრებისთვის. ლიზა უზრუნველყოფს კომუნიკაციას ბენეფიციარების მშობლებსა და ასისტენტებს შორის, კოორდინაციას უწევს ადმინისტრაციულ პროცესებს და აქტიურად მონაწილეობს ბავშვებისა და მოზარდების ინდივიდუალური საჭიროებების დროულად იდენტიფიცირებასა და მხარდაჭერაში. მისი უწყვეტი ჩართულობა ხელს უწყობს სტაბილურ, ჰარმონიულ და შედეგზე ორიენტირებულ მუშაობას, რაც „სტუდია ეიდისის“ მისიის — მძიმე და ღრმა ინტელექტუალური შეფერხების მქონე ბავშვებისა და მოზარდების საზოგადოებაში ინტეგრირების — განხორციელებას ემსახურება.

შორენა საბანაძე ხელმძღვანელობს ქარელის მუნიციპალიტეტში მოქმედ პერსონალური ასისტენტის პროგრამას, რომელიც მიმართულია ბენეფიციართა საჭიროებებზე მორგებული მხარდაჭერისა და პროგრამის ეფექტური მართვის უზრუნველყოფაზე. მისი საქმიანობა მოიცავს მჭიდრო თანამშრომლობას პერსონალურ ასისტენტებთან, „სტუდია ეიდისის“ გუნდთან და ბენეფიციართა ოჯახებთან. შორენა აქტიურად მონაწილეობს ტრენინგებსა და პროფესიული განვითარებისთვის საჭირო აქტივობებში, რაც საშუალებას აძლევს შექმნას ნდობით სავსე და ინდივიდუალურ საჭიროებებზე მორგებული გარემო.

მანანა კობახიძე სოციალურ სფეროში 17-წლიანი გამოცდილების მქონე პროფესიონალია, მათ შორის 15 წელი მუშაობს უფროსი სოციალური მუშაკის პოზიციაზე. უკვე ერთი წელია ის სტუდია ეიდისის გუნდს შეუერთდა მძიმე და ღრმა გონებრივი შეზღუდვის მქონე პირების ბინაზე მოვლის პროგრამაში. მისი საქმიანობა მოიცავს ბენეფიციარების საჭიროებების კომპლექსურ შეფასებას, ინდივიდზე მორგებული მომსახურებების კოორდინაციასა და მათი კეთილდღეობის მაქსიმალური მხარდაჭერის უზრუნველყოფას. სოციალური და ფსიქო-სოციალური მდგომარეობის შეფასების პროცესში მჭიდროდ თანამშრომლობს სხვადასხვა პროფესიონალთან, უზრუნველყოფს მომსახურების ხარისხისა და უსაფრთხოების კონტროლს, კრიტიკული შემთხვევების დროულ გამოვლენასა და შესაბამის რეაგირებას. მისი მუშაობის მნიშვნელოვანი ნაწილი მიმართულია ბენეფიციარების სოციალური ინკლუზიის გაძლიერებასა და უნარების განვითარებაზე

ხატია ტაბატაძე არის ქცევის კონსულტანტი 14-წლიანი გამოცდილებით, ფსიქოლოგიის მაგისტრი და სუპერვაიზორი. მას აქვს მიღებული ბაკალავრისა და მაგისტრის ხარისხი ილიას სახელმწიფო უნივერსიტეტში, ასევე ქცევის გამოყენებითი ანალიზის (ABA) სასერთიფიკატო პროგრამა. ხატია ფლობს ABLLS-R და VB-MAPP ინსტრუმენტებს, TOT სერტიფიკატს და აქვს გავლილი ადგილობრივი და საერთაშორისო სუპერვიზიები, მათ შორის მერიენ ჯექსონის, ამანდა ადამსისა და გრეგორი ჰენლის ტრენინგები. მისი საქმიანობა მოიცავს ბავშვების ქცევით შეფასებას, ინტერვენციის ინდივიდუალური გეგმების შემუშავებას, სპეციალისტების სუპერვიზიასა და მშობლების მხარდაჭერას, ხოლო პროფესიული მისია — თითოეული ბავშვის უნარებისა და პოტენციალის აღმოჩენა და განვითარებაა, მეცნიერულ მეთოდებზე დაყრდნობით

ანაიტ კარსლიანი „სტუდია ეიდისის“ მარნეულის ფილიალის ადმინისტრაციული მენეჯერია. მას აქვს 3-წლიანი გამოცდილება სოციალური სერვისების ადმინისტრაციულ მენეჯმენტში, რაც საშუალებას აძლევს ეფექტურად მართოს როგორც ყოველდღიური პროცესები, ისე შშმ პირთა საჭიროებებთან დაკავშირებული გამოწვევები. მარნეულის მრავალეთნიკურ გარემოში ანაიტის პრიორიტეტია ისეთი სივრცის შექმნა, სადაც თითოეული ბენეფიციარი შეძლებს საჭირო მხარდაჭერის მიღებას და საკუთარი პოტენციალის რეალიზებას. იგი აქტიურად მუშაობს სერვისების ხელმისაწვდომობაზე, თანამშრომელთა კოორდინაციაზე, დოკუმენტაციის მართვაზე და ორენოვანი კომუნიკაციის გამარტივებაზე. ანაიტისთვის განსაკუთრებული მნიშნელობა აქვს იმ ფაქტს, რომ მისი ყოველდღიური საქმიანობა რეალურად აუმჯობესებს ბენეფიციართა და მათი ოჯახების ცხოვრების ხარისხს — სწორედ ეს წარმოადგენს მის პროფესიულ მოტივაციასა და პასუხისმგებლობის საფუძველს.

ირმა მწყერაშვილს 9 წლიანი გამოცდილება აქვს სპეციალური საჭიროებების მქონე ბავშვებთან მუშაობაში. „სტუდია ეიდისის“ ქვეპროგრამაში ის პასუხისმგებელია მძიმე და ღრმა განვითარების შეფერხების მქონე ბავშვთა ბინაზე მომსახურების ინდივიდუალური გეგმების განხორციელებაზე. მისი საქმიანობა მოიცავს ინდივიდუალური ზრუნვის განმახორციელებელ პირებთან სისტემურ სუპერვიზიას, ბავშვის მდგომარეობის მონიტორინგსა და მხარდაჭერას, რაც ხელს უწყობს მოტორული, სოციალური და კომუნიკაციური უნარების განვითარებას. მისი პროფესიონალიზმი და ბავშვზე ორიენტირებული მიდგომა უზრუნველყოფს მაღალი ხარისხის ინდივიდუალურ მხარდაჭერას და ინტეგრირებულ განვითარებას